Emaus

Zwoa
wia im Newö,
mit am Herzn
so schwaar,
wia wann
dö ganz Weid
bloß oa
Untergang waar.

Aus
war da Draam,
der da Jesus
is gwen!
Im Grab
liegt dö Hoffnung:
und dös
is net weng.

So
stoiperns
valorn
auf Emmaus zua.
In ea bohrt
da Zweifö
und laßt ea
koa Ruah.

Zletzt
kommt no
a Dritter
und fragt's
hoamlö aus.
Da laarn sa sö
's Herz volla
Elend aus.

Und
wiara ea
zuaredt'
so einsichtö, guad,
da is' wia
wann's Herz
wieda
brennad wurd.

Da
Newö vefliagt
und sie seign
wieder aus;
da Fremd
is so nah
und sie
ladnd na
ins Haus.

Und
wiara ea
's Brot bricht
und Danksagung hoit,
da geht ea
a Liacht auf;
da Vorhang
der foit.

Auf
brechans in d'Nacht,
dö koa Nacht
nimma is:
da Herr Jesus
der lebt und
dös wissn's
eiz gwiß!

In
Jerusalem
trifft eana
Botschaft
dann zamm,
mit dö andern
dö aa eana Ostern
scho ham.

Beim
Brotbrecha
hams an Herrn
Jesus dakennt:
und do triffst'n
aa heut no, -
wennst a Herz hast,
dös brennt!



(Quelle: Text: Max Huber, Emmaus; in: In dene Dag had da Jesus gsagd: Neues Testament bairisch. hrsg. von Ludwig Merkle. München 1978, Zeichnung: www.catho.be/bw/CPE/Accueil.html)